KAZ Minerals Aktogay 8 миллиард теңгеден аса салықты төлемеген

Кен өндіруші компания 8 миллиард теңгеден аса салықты төлемеген, деп хабарлайды Qazaqinfo.kz Бас прокуратура мәліметіне сілтеме жасап.

Алматы прокуратурасы талдау барысында, KAZ Minerals Aktogay ЖШС салықты төмендету дерегін анықтады.

Салық төлеуші жыл сайын KAZ Minerals Aktogay Finance Limited холдингтік компаниясына дивидендтер төлегені белгілі болды. Салық заңнамасының талаптарына сәйкес құн өсімінен түскен табыстар, дивидендтер, сыйақылар, роялти төлем көзінен 15 пайыз мөлшерлемесі бойынша салық салуға жатады.

Алайда салық есептілігін зерттеу, ЖШС жыл сайын 2018-2022 жылдар аралығында талап етілетін 15 пайыздың орнына 10 пайыз мөлшерлемесі бойынша салық ұстап, резидент емеске қатысты сыйақы төлегенін көрсетті, — делінген хабарламада.

Прокуратураның талабы бойынша салық органы ЖШС қызметінде корпоративтік табыс салығын есептеу мен төлеудің дұрыстығын тексеру жүргізген. Дерек расталды, сондықтан 8,2 миллиард теңге көлемінде қосымша салық есептелді. Салық төлеуші көрсетілген соманы мемлекет кірісіне толық көлемде төледі. Мемлекет мүддесі қорғалғаны айтылды.

Фото: kazminerals.com