Дархан Қыдырәлі көне қорымның бір шетін базар басып бара жатқанын айтты
Сенат депутаты Дархан Қыдырәлі ұлтымыздың тарихи-рухани және киелі орындарын сақтау қажет екенін айтты, деп хабарлайды Qazaqinfo.kz.
Сенатордың сөзіне қарағанда, Қазақстанда ұлттың рухани бағдарына айналған және халыққа қорған болған көптеген киелі орындарды сақтау мақсатында жұмыстарды күшейту керек.
Кешендердің көбі жойылған, енді бірі бастапқы келбетінен қатты ауытқыған, тарихи орындарды қалауынша өзгерткен. Сол сияқты, сансыз бабтар мекені Сайрамда қастерлі орындар қараусыз жатыр. VIII-IX ғасырдан қалған көне қорымның бір шетін базар басып барады. Бағзы Исфиджабтан жеткен Ибраһим ата, Қарашаш ана, Қызыр хазірет сияқты тарихи-рухани нысандарды сақтау қажет. Сондықтан көне Сайрам мен Созақтағы рухани ескерткіштерді сақтау ісін Түркістандағы «Әзірет Сұлтан» қорық-мұражайына тапсыруды ұсынамыз, – деді сенатор.
Сондай-ақ Дархан Қыдырәлі еліміздегі рухани ескерткіштерді қорғауға ерекше назар аудару қажеттігін және олар біздің мұрамыз бен тарихымыз екенін айтты.
Ұлттың иммунитетін қалыптастыратын рухани орындар тағылым мектебі болуы керек. Ғасырлар бойы қалыптасқан рухани қалқанымыз – діңгекті дәстүр мен рухани бұлақ көздері зерделене бастаса, деструктивті теріс ағымдардың жолын жабуға септеседі. Тарихи кешендерді ұлттық бренд ретінде ЮНЕСКО-ға ұсыну ісін жүйелеп, жеделдету қажет. Мемлекет басшысының 2019 жылы елімізді рухани-этнографиялық туризмнің орталығына айналдыруды тапсырғаны белгілі. Сондықтан киелі мекендерді мемлекет қарауына алу, заңды қатайту, инфрақұрылымды дамыту қажет деп ойлаймын, – деді Дархан Қыдырәлі.
Фото: ашық дереккөз
