БҚО-да өрт салдарынан 5 баласынан айырылған отбасыға баспана беріледі
Батыс Қазақстан облысында жекеменшік үйден өрт шығып, бес бала қаза тапқан еді. Өңір әкімі жағдайды жеке бақылауына алғанын жеткізді, деп хабарлайды Qazaqinfo.kz.
Жымпиты ауылында болған қайғылы оқиғадан кейін Батыс Қазақстан облысының әкімі Нариман Төреғалиев ресми мәлімдеме жасады.
Әкімнің айтуынша, оның тапсырмасымен оқиға орнына облыс әкімінің орынбасары жіберілген. Аудан әкімі де сол жерде болып, барлық төтенше жағдай және тиісті қызметтердің жұмысын үйлестіріп отыр.
Өңір басшысы қаза тапқан балалардың отбасына қажетті барлық көмек көрсетілетінін айтты. Отбасыға жерлеу рәсімін ұйымдастыру, психологиялық қолдау көрсету, баспанамен қамтамасыз ету және басқа да әлеуметтік қолдау шаралары қолға алынады.
Оқиға орнында ТЖД қызметкерлері, полиция, медицина мамандары және өзге де сала мамандары жұмысын жалғастырып жатыр. Төреғалиев жағдайды жеке бақылауында ұстап отырғанын атап өтті.
Еске салсақ, осыған дейін Батыс Қазақстан облысында жеке тұрғын үй өртеніп, 5 бала қаза тапқанын жазғанбыз.
Фото: pixabay.com
