Жемқорлық жасады деп айыпталған шымкенттік шенеунік ақталып шықты

Шымкент қалалық мамандандырылған соты Жолаушылар көлігі және автомобиль жолдары басқармасының экс-басшысы Мұхтар Қоқанбаевты ақтап алды, деп хабарлайды Qazaqinfo.kz Оtyrar.kz порталына сілтеме жасап. 

Белгілі болғандай, экс-шенеунік сот залынан босатылған.

Мемлекеттік айыптаушы екі жыл жаза мерзімін беріп, оны қауіпсіздігі төменгі режимдегі колонияда өтеуді сұрады. Ал бүгін 5 айға созылған тергеуден кейін Мұхтар Қоқанбаев сот залынан ақталып шықты, — делінген хабарламада.

Еске сала кетейік, жоғары лауазымды шенеуніктің ұсталғаны туралы ақпарат биылғы маусым айының соңында пайда болған еді. Сол кезде Антикор Қоқанбаевтың сыбайлас жемқорлыққа қатысы бар деген күдікпен ұсталғанын мәлімдеген болатын.

Оған кәсіпкерден 13 миллион теңге көлемінде пара алды деп айып тағылды. Алайда кейіннен бұл бап ҚР Қылмыстық кодексінің 361-бабының 4-бөлігі «Лауазымды өкілеттігін теріс пайдалану» деген санатқа ауыстырылды.

Фото: turkistanzaman.kz