Қазақстандық блогерлер енді жарнамалық жазбаларына белгі қояды
Мәдениет және ақпарат министрі Аида Балаева Facebook-тегі парақшасында биыл 2 наурыздан бастап инфлюенсерлер (блогерлер) коммерциялық немесе шарттық негізде орналастыратын онлайн-жарнаманы таңбалауға тиіс екенін жазды, деп хабарлайды Qazaqinfo.kz.
Былтыр 10 шілдеде Мемлекет басшысы «Онлайн-платформалар және онлайн-жарнама туралы» заңға қол қойды. Заң жобасы Қазақстанда қауіпсіз онлайн орта құруға бағытталған. Құжаттағы көрсетілген негізгі құқықтық тетіктердің бірі – желідегі жарнаманы таңбалау міндеттемесі. Біз зерттеген халықаралық тәжірибе көрсеткендей, жетекші елдер онлайн-жарнаманың маңызды рөлін және оны онлайн-платформаларда көрсету тетіктеріне ерекше назар аударады. Сонымен қатар онлайн-жарнаманың ашықтығын арттыруға бағытталған талаптарды көздейді, — делінген жазбада.
Осы орайда ведомство басшысы «Әділет» порталында желідегі жарнаманы таңбалау ережелерін белгілейтін бұйрық жарияланғанын, ол ереже 2 наурыздан бастап күшіне енетінін еске салды.
Ережелер бизнеске әсер ету үшін оң бағаланғанын және толығымен Қазақстанның онлайн сегментінде кең таралған қазіргі тәжірибеге негізделгенін атап өту қажет. Осы ережелерді қалыптастыру кезінде коммерциялық негізде орналастырылған контентті өз бетінше белгілейтін медиа-субъектілер тәжірибесіне сүйендік. Біз өз кезегімізде осы трендті Қазақстан Республикасының бүкіл интернет кеңістігіне тарату жөн деп есептейміз, — деді Аида Балаева.
Ережеге сәйкес инфлюенсерлер (блогерлер) коммерциялық немесе шарттық негізде орналастыратын онлайн-жарнаманы таңбалауға тиіс. Олар жарияланымның басында немесе соңында онлайн ортада белсенді қолданылатын төмендегідей тұжырымдардың бірін көрсету керек:
— «жарнама»;
— «жарнамалық материал»;
— «серіктестік материал»;
— «демеушілік материал»;
— «жарнама құқығында»;
— «демеушімен төленген»;
— «PR құқығында»;
Әлеуметтік жарнаманы (қайырымдылық және коммерциялық емес сипаттағы басқа да қоғамдық пайдалы мақсаттарға қол жеткізуге бағытталған) және жедел хабар алмасу қызметтерінде (мессенджерлер) орналастырылатын жарнаманы белгілеудің қажеті жоқ.
Фото: Әйелдер істері және отбасылық-демографиялық саясат жөніндегі ұлттық комиссия
