Қазақстан мен Татарстан арасындағы исламдық білім беру мәселелері талқыланды
Қазақстан Республикасының Қазан қаласындағы Бас консулы Ерлан Ысқақов Татарстан Республикасының Мұсылмандар діни басқармасының басшысы мүфти Камиль хазірет Самигуллинмен исламдық білім беру мәселелерін талқылады, деп хабарлайды Qazaqinfo.kz.
Сұхбат барысында Қазақстан мен Татарстан мұсылмандарының рухани басқармалары, атап айтқанда, ислам білімі мен рухани-ағарту қызметі арасындағы мәселелері талқыланды. Дәстүрлі рухани-адамгершілік және мәдени-тарихи құндылықтарды бөлісетін тұлғаны қалыптастыру, сондай-ақ қоғамның бірлігі мен біртұтастығын нығайту мәселелеріне ерекше назар аударылды. Қазіргі уақытта 80-нен астам қазақстандық студент Ресей ислам институтында оқиды.
Тараптар қоғам құндылықтарын сақтау және нығайту мақсатында дінаралық диалогты нығайту, конфессияаралық әріптестікті одан әрі дамыту қажеттігіне назар аударды. Қазақстанның Әлемдік және дәстүрлі діндер лидерлерінің съезін шақыру жөніндегі бастамасы әртүрлі діндер мен конфессиялар өкілдерінің диалогы үшін платформа ұсына отырып, өзінің жоғары өзектілігін сақтайтыны да аталып өтті.
Кездесу соңында мүфти Камиль хазірет заманауи халықаралық стандарттарға сәйкес келетін және әлемге әйгілі, бірегей баспа шрифтімен басылған және түпнұсқа типографиялық бедердің негізінде әзірленген «Қазан басмасы» Құранының жаңартылған басылымынан Қазақстан мұсылмандары діни басқармасына 100 кітап табыс етті.
Аталған аттас басылым алғаш рет 1803 жылы Қазанның Азиялық баспаханасында жарық көрді және мұсылман әлемінде теологиялық тұрғыдан танылған «ар-Расм аль-Усмани» стандартына сәйкес келетін алғашқы баспа Құраны ретінде тарихқа енді. Бұл оқиға мұсылман елдерінде баспа Құранын тарату дәстүрінің негізін қалады.
Фото: дереккөз
