Болашақ заңгерлер мәдениеті
Құқық саласы – қоғамның тұрақтылығы мен әділеттілігінің кепілі. Бұл салада еңбек ететін заңгерлер тек заңдарды біліп қана қоймай, жоғары мәдениет деңгейіне ие болуы қажет. Заңгер мәдениеті кәсіби этика, қарым-қатынас шеберлігі, моральдық ұстанымдар және интеллектуалдық даму сияқты маңызды аспектілерді қамтиды.
Әділеттілік, адалдық және объективтілік – әрбір заңгердің ұстанатын басты қағидалары. Болашақ заңгер заң нормаларын жетік білуімен қатар, оларды әділ және адамгершілік тұрғысынан қолдана білуі керек. Кез келген құқық қорғаушы немесе адвокат заңды өз мүддесіне емес, қоғам игілігі үшін пайдалануы тиіс Заңгер қызметінде тиімді қарым-қатынас жасау өте маңызды. Сот процестерінде, келіссөздер жүргізуде немесе клиенттермен кездесуде заңгердің сөйлеу мәдениеті шешуші рөл атқарады. Ол ойын нақты, дәлелді әрі сенімді жеткізе білуі керек. Сонымен қатар, оппоненттің пікірін тыңдап, оны талдай білу қабілеті де кәсіби шеберліктің көрсеткіші болып табылады.
Болашақ заңгердің мәдениеті тек заңды білуімен шектелмейді. Ол жоғары моральдық қасиеттерге ие болуы қажет. Адалдық, парасаттылық, жауапкершілік – бұл заңгердің беделін қалыптастыратын басты сипаттар. Заңгер қоғамдағы әділеттілікті орнатуға жауапты болғандықтан, оның жеке өмірі мен кәсіби қызметі өзара үйлесімді болуы тиіс.Құқықтық жүйе үнемі өзгеріп, жаңарып отырады. Сол себепті болашақ заңгерлер үнемі ізденіс үстінде болуы қажет. Олар құқықтық реформалар, халықаралық заңнамалар, заманауи құқықтық технологиялар туралы хабардар болуы тиіс. Сонымен қатар, психология, философия, саясаттану, экономика сияқты пәндерді меңгеру – заңгердің жан-жақты дамуына ықпал етеді. Әл-Фараби атындағы ҚазҰУ Заң факультеті қылмыстық құқық, қылмыстық іс жүргізу және криминалистика кафедрасы жоғарыда аталған қабілетті білім алушыларға сіңіруге тырысады.Білім алушыларға заң саласындағы жұмыс маңыздылығын,жұмыс барысы маңызды болғандықтан өз қызметіне құрметпен қарауды және жауапкершілік танытуға шақырады.Болашақ заңгер мәдениеті кәсібилік пен адамгершіліктің үйлесімінен тұрады. Ол заң талаптарын сақтаумен қатар, қоғамға қызмет ететін тұлға болуы тиіс. Әдептілік, жауапкершілік, шешендік өнер, моральдық тазалық – нағыз заңгердің басты қасиеттері. Осы құндылықтарды бойына сіңірген маман ғана әділетті қоғам қалыптастыруға үлес қоса алады.
Г. Мухамадиева,
әл-Фараби атындағы ҚазҰУ Заң факультеті қылмыстық құқық, қылмыстық
іс жүргізу және криминалистика кафедрасының доценті, з. ғ. к.,
Бағыжан Бақтығалиұлы,
әл-Фараби атындағы ҚазҰУ Заң факультетінің студенті
Фото: ашық дереккөз
