Елімізде 6 жасқа толған балалардың балабақшада қалуына мүмкіндік беріледі
Қазақстанда мектепке дейінгі дайындықтан өткен балалардың 31 шілдеге дейін балабақшада қалуына мүмкіндік берілмек, деп хабарлайды Qazaqinfo.kz Мәжілістің баспасөз қызметіне сілтеме жасап.
Бүгін мәжіліс кейбір заңнамалық актілерге мәдениет және білім беру мәселелері бойынша енгізілетін өзгерістер мен толықтыруларды бірінші оқылымда мақұлдад1ы.
Түзету мектепке дейінгі дайындықтан өткен балалардың 31 шілдеге дейін балабақшада қалуына мүмкіндік береді.
Бұған дейін ата-аналар балалары 6 жасқа толған соң балабақшадан босатылып, оқу жылы басталғанша мектепке де бара алмайтыны туралы шағымданған еді.
Қазіргі таңда ата-аналар жиі кездесетін мәселенің бірі – балаларының 6 жасқа толғаннан кейін, бірақ оқу жылы басталғанға дейін балабақшадан шығарылуы. Бұл өз кезегінде ата-аналар үшін үлкен қиындықтар тудырады, өйткені олар бала күтімін ұйымдастыру мәселесімен бетпе-бет келеді. Мысалы, егер бала жылдың басында, ақпан айының 5 күні 6 жасқа толса, оны кейбір балабақшалар дереу шығарып жібереді, бірақ ол бала мектепке әлі бара алмайды. Осы норманы енгізу арқылы балалардың балабақшада жазға дейін қалуына мүмкіндік беріледі, — деді Мәжіліс депутаты Асхат Аймағамбетов заң жобасын таныстыра отырып.
Фото: aikyn.kz
