Қазақстанда жаңа айыппұл пайда болды

Қазақстанда тұтынушылардың құқықтарын бұзған кәсіпкерлерге қатысты талаптар қатаңдатылды. 13 наурыздан бастап күшіне енген өзгерістерге сәйкес, бұдан былай ескертумен шектелу тоқтатылады, оның орнына айыппұл салынады, деп хабарлайды Qazaqinfo.kz.

Қандай бұзушылықтар айыппұлға әкеледі?

Тұтынушылардың құқықтарын қорғау туралы ақпаратты орналастырмау;

Шағымдарға уақытында жауап бермеу;

Тауарды қайтару мерзімдерін сақтамау.

Айыппұл мөлшері:

Шағын бизнес – 15 АЕК (58 980 теңге, 2025 ж.);

Орта бизнес – 20 АЕК (78 640 теңге);

Ірі бизнес – 25 АЕК (98 300 теңге).

Тұтынушылардың шағымдары көбейген
Тұтынушылардың құқықтарын қорғау комитетінің мәліметінше, 2024 жылы Сауда және интеграция министрлігіне 62,5 мың шағым түскен. Ал биылғы екі айда 10 мыңнан астам шағым тіркелді. Шағымдардың басым бөлігі туризм, тұрғын үй-коммуналдық шаруашылық (ТКШ), денсаулық сақтау және сауда салаларына қатысты.

ӘҚБтК-ге енгізілген басқа өзгерістер:

Әлеуметтік маңызы бар азық-түлікке шекті үстемеақыны заңсыз көтергендерге айыппұл көбейтілді:

Жеке тұлғалар мен шағын бизнес – 5 АЕК (19 660 теңге);

Орта бизнес – 35 АЕК (137 620 теңге);

Ірі бизнес – 150 АЕК (589 800 теңге).

Кәсіпкерлік қызметке заңсыз араласқан лауазымды тұлғаларға 200 АЕК (786 400 теңге) көлемінде айыппұл салу қарастырылды.

Бұл жаңа шаралар тұтынушылардың құқықтарын қорғауды күшейтіп, кәсіпкерлердің жауапкершілігін арттыруға бағытталған.

Фото: Azh.kz