ҚазҰУ студенттері «Тұрақты қалалар мен қоғамдар құру жолында» тақырыбын талқылады
Әл-Фараби атындағы ҚазҰУ заң факультеті азаматтық құқық және азаматтық іс жүргізу, еңбек құқығы кафедрасының студенттері ТДМ 11 «Тұрақты қалалар мен елді мекендер» мақсаттарының елімізде жүзеге асуы үшін қандай шаралар атқарылуы керектігін талқылады. Пікірталасқа қафедрамыздың белсенді студенттері қатысты. Олар қала дамуы мен қоғамдық тұрақтылық мәселелерін ғана емес, сондай-ақ экологиялық жауапкершілік, инфрақұрылымның тиімділігі мен қалалардағы әлеуметтік теңдікті қамтамасыз ету мәселелерін қарастырды.
Білім алушылар әртүрлі тақырыптар бойынша өз ойларын ортаға салды. Әсіресе, жасыл қалалар мен экологиялық таза инфрақұрылым жасау, көлік жүйесін жетілдіру, қалалардағы тұрмыстық қалдықтарды басқару, энергия үнемдеу технологияларын енгізу, жасыл аймақтар мен қоғамдық кеңістіктерді көбейту мәселелері кеңінен талқыланды. Көптеген ұсыныстар айтылып,өз пікірлерімен бөлісті.
Студенттердің пікірінше, қалаларда энергияны үнемдеу және экологиялық таза технологияларды енгізу маңызды деп есептейді. Мысалы, жаңартылатын энергия көздерін пайдалану, экологиялық таза көлік құралдарын дамыту және жасыл құрылыс технологияларын қолдану қажет деп есептейді. Қала тұрғындары үшін қауіпсіз және қолайлы орта құру үшін қоғамдық кеңістіктер мен инфрақұрылымның сапасын жақсарту керек. Бұл тұрғыда көше жарығының тиімділігі, қоғамдық көліктердің қолжетімділігі, сондай-ақ көлікпен байланысты экологиялық мәселелер де шешілуі қажет. – Оқу ордамыздың білім алушылары қалалық көлік жүйесін дамыту қажеттілігін атап өтті.
Қалаларда көлік тығынын азайту және экологиялық таза көліктерді енгізу — бұл тек қала тұрғындары үшін ғана емес, жалпы экология үшін маңызды. Қоғамдық көліктердің қолжетімділігі мен тиімділігін арттыру, велосипед жолдарының санын көбейту және жаяу жүргіншілерге арналған аймақтарды кеңейту де ұсынылған шаралар қатарында.
Студенттер жасыл қалаларды құрудың маңыздылығын атап өтті. Жасыл аймақтар мен саябақтар тұрғындардың экологиялық жағдайын жақсартып, қала экологиясын да тұрақтандырады. Сонымен қатар, қалалардағы қалдықтарды өңдеу және қайта өңдеу мәселелері де талқыланды.
Қара шаңырақ студенттерінің ТДМ 11 мақсаттары бойынша өткізген талқылауы қоғамның қала мен ауыл инфрақұрылымын жақсартуға, экологияны қорғауға, тұрақты қалалар мен қоғамдар құруға бағытталған ауқымды жұмыстарға жастардың белсенді қатысуының маңыздылығын көрсетті. Білім алушылар өздерінің білімдері мен идеяларын қоғамның дамуына, еліміздің болашағына үлес қосуға бағыттауға дайын екендіктерін білдірді. Бұл талқылаулардың нәтижелері қала дамуы мен тұрақты қоғам құру үшін жасалған қадамдар ретінде маңызды орын алады. ҚазҰУ студенттері еліміздің қала мен қоғамдарын жасыл әрі тұрақты ету жолында өз үлестерін қосып, әлемдік тұрақты даму мақсаттарына жетуге атсалысады.
Г. Нурахметова,
әл-Фараби атындағы ҚазҰУ
Заң факультеті азаматтық құқық және азаматтық
іс жүргізу, еңбек құқығы кафедрасының з. ғ. к., доцент
