Түркияда сайлау кезінде екі адам қайтыс болды
Ризе және Трабзон қалаларында сайлау учаскесінің қызметкері мен дауыс беруге келген 75 жастағы тұрғын жүрек талмасынан қайтыс болды, деп хабарлайды Qazaqinfo.kz inbusiness.kz сайтына сілтеме жасап.
Жергілікті БАҚ таратқан мәліметке сүйенсек, оқиға Ризе қаласының Пазар аймағындағы Икизтепе ауданында болды.
Алынған мәліметтерге қарағанда, бүгінгі Президент және Парламент сайлауында учаске қызметкері Шереф Курт жұмыс барысында жүрек талмасына ұшыраған. Әріптестері бірден жедел жәрдем қызметін шақырған.
Оқиға орнына келген медициналық топ Куртқа алғашқы көмек көрсеткеннен кейін жедел жәрдеммен Качкар ауруханасына жеткізілді. Онда дәрігерлер қолдан келгеннің бәрін жасады. Алайда Курт ауруханада көз жұмды.
Сонымен қатар Трабзон қаласында да қайғылы жағдай болды. Акчаабат аймағындағы Дережик ауданында 75 жастағы Айсел Улусой туыстарымен бірге дауыс беруге барды. Дауыс беру кабинасына кіріп, таңдауын жасаған Улусойдың жағдайы кенет нашарлап кеткен. Сол жердегі адамдардың алғашқы көмек көрсетуінен кейін ауруханаға жеткізілмек болған Улусой қайтыс болды. Оқиғаға қатысты тергеу жүргізіліп жатыр.
Фото: Yves Herman/Reuters
