Алматыдан Астанаға келе жатқан автобус қатты желден аударылып қалды
21 шілдеде «Алматы-Екатеринбург» тасжолында жолаушылар автобусы аударылып қалды, деп хабарлайды Qazaqinfo.kz.
Әлеуметтік желіде оқиға орнынан кадрлар тарады. Қарағанды облысының аумағында болған жол-көлік оқиғасының видеосы Instagram желісіндегі dorogi_karagandy тобында жарияланды. Кадрдан тас жолда «қырынан» жатқан автобусты және көптеген адамды аңғару қиын емес.
Бұған қатысты Қарағанды облыстық Полиция департаменті пікір білдіріп, оқиғаның 21 шілде күні кешкі 17.30 кезінде Осакаров кентінен 10 шақырым жерде болғанын жеткізді. 33 жастағы Yutong жүргізушісі қатты жел соғып тұрғанда рөлге ие бола алмай қалып, соның салдарынан автобус аударылған.
Белгілі болғандай, автобус салонында 20 жолаушы отырған.
Жол апаты салдарынан 65 жастағы ер адам дене жарақатымен ауруханаға жеткізілді, – делінген хабарламада.
Қазіргі уақытта тәртіп сақшылары сараптама тағайындағанын хабарлады.
Фото: instagram.com/dorogi_karagandy
