Елордалық тұрғын курьер атын жамылып кокаин жеткізген (ВИДЕО)
Астанада азық-түлік жеткізуші атын жамылған есірткі сатушы кокаинмен ұсталды, деп хабарлайды Polisia.kz.
Жедел-іздестіру іс-шаралары барысында арнайы операция жүргізіліп, нәтижесінде қала аумағында есірткі сатумен айналысты деген күдікпен бұрын сотталған 23 жастағы тұрғын ұсталды. Ол азық-түлік жеткізуге арналған курьер деген желеумен есірткіні жасырын қойып кету арқылы сатқан.
«Интернет ресурстары арқылы тұтынушылардан тапсырыстар алған. Жеке тінту барысында сатушыдан сатуға арналған кокаин есірткі заты тәркіленген. Полиция қызметкерлері ұсталған азаматтың автокөлігін және пәтерін рұқсат етілген тінту нәтижесінде есірткінің іздері бар электронды таразылар, қаптамаға арналған полиэтилен пакеттер, сондай-ақ кокаин, мефедрон және марихуана есірткі заттарының ассортименті тәркіленген», — делінген хабарламада.
Есірткі сатушы Астана Полиция департаментінің уақытша ұстау изоляторына қамалды, есірткі сатуға қатысы бар сыбайластарды анықтау бойынша тергеу амалдары жүргізіліп жатыр.
Фото: дереккөз
