Жер сілкінісі: Алматыда такси бағасы шарықтап кетті

Алматыдағы жер сілкінісінен кейін такси бағасы шарықтап кеткен. Бұл туралы әлеуметтік желілерде жазбалар тарады, деп хабарлайды Azattyq Ruhy.

Тұрғындардың айтуынша, жүргізушілер бағаны 2 есе қымбаттатқан.

Бұрын 900 теңгенің үстінде алатын жерге, 1800 теңге алып тұр, — деп жазды желіде Маргарита Өскембаева.

Екі сағат бұрын яндекс такси 690 теңгені көрсетіп еді, енді 1380 теңге деп тұр, — деп жазды Салтанат Бектұрсынова.

Қала іші ғана емес, қалааралық тасымалдау құны да шарықтап кеткен. Мысалы, қазір Алматыдан Қаскелеңге бару эконом класпен 6 мың теңгеге шығып тұр. Әдетте ол 3500 теңгеден басталады.

Басқа бір қосымшада такси жүргізушілері Қаскелеңге 7 мың теңгеге апаратынын жазған.

Айта кетсек, бүгін Алматыда 5 балдық жер сілкінісі тіркелді. Жер дүмпуі Алматы облысында және Жетісу облысында сезілген.

Фото: Kursiv.media